TEMA-ARTIKELS

Vanuit die 2012 Bybelse Dagboek word twee dagstukkies van dr Piet van Staden van Stellenbosch geplaas, naamlik die tekste van 1 en 8 Januarie.

Dr Van Staden skryf: Om God se gesig te sien, is die uiterste, die finale ervaring. Só magtig is dit, só heerlik, dat die mens moet beswyk by die direkte aanblik van God. Maar God se verskyning gaan gepaard met tekens. Waar Hy was, bly sy teenwoordigheid talm, kan dit agterna nog bemerk word, hoor jy nog die roep die Here.

Wil jy gesprek voer oor God? Dan moet jy eers gesprek voer met Hom. Kyk om jou rond. Sien sy talmende teenwoordigheid in die grootsheid van die natuur, in die innigheid van jou verhoudings, in die wonder van die liefde. Praat mét Hom, dan sal dit maklik wees om óór Hom te praat.

Met Epifanie word ons herinner aan die lewe van Jesus op aarde. In aansluiting daarby skryf dr Wouter van Wyk oor die Kerk se nuwe tema vir die volgende paar jaar: In Christus se voetspore.

Dr Daan van Wyk (jr) sluit by hierdie tema aan. Daar lê nou die tydperk van Epifanie voor: Dit beteken dat op Sondae in ons eredienste die lewe van Jesus op aarde in herinnering geroep word. Ons luister na die wysheid wat Hy aan stukkende, verwarde, woedende mense kom bied het. Ons verstaan die lewe en toekoms beter as ons sy gelykenisse begryp. Ons skep moed as ons begrip kry vir die wonders wat Hy gedoen het en steeds doen.

Daarna verootmoedig ons ons saam met die kerk van die eeue wanneer ons in die voetspore van Christus opnuut saam met Hom op sy lydensweg gaan. Ons doen dit Sondae in die eredienste, in ons persoonlike lewens en as gesinne rondom huisgodsdiens. Ons lewens kom tot stilstand voor die kruis as ons opnuut besef dat net deur die kruisdood van Jesus Christus daar vir ons troos is in hierdie lewe en na hierdie lewe. Daarna jubel ons as nuwe mense saam met die kerk oor die ganse wêreld oor die opstanding van Christus en sy hemelvaart. Ons geloof word deur alles opnuut gewek en versterk met die viering van die uitstorting van die Heilige Gees.

Ds Jaap Steenkamp kyk vanuit die belydenisskrifte na die nuwe jaar wat wag. Die lewe van ’n gelowige moet vir meer as een rede ’n lewe van dankbaarheid wees. God die Vader het aan ons die opdrag gegee om sy verteenwoordigers te wees, en selfs ten spyte van die sondeval bly Hy aan ons getrou – Hy bewaar ons geloof en vergewe ons sonde op grond van die geloof in ons Here, Jesus Christus. Hoe kan ons dan anders as om ons hele lewe tot sy eer te leef?