Van die redakteur

 

Dr Wian Kloppers skryf oor die rimpeleffek.

 

Die beeld op die voorblad van ’n waterdruppel wat in water val, vang die betekenis van Epifanie op ’n unieke manier vas. Nee, die metafoor van iets ‘vasvang’ werk juis nie, omdat die beeld op die voorblad en wat Epifanie beteken juis alles met beweging te make het! Die voorbladmetafoor dui dus eerder op die immer bewegende en veranderlike, betekenisvormende uitkringeffek van wat hierdie tyd van die Kerkjaar vir ons inhou.

 

Christus se geboorte is sekerlik die grootste ‘waterdruppel’ ooit: Die uitkringende rimpeleffek daarvan het vandag steeds oneindigende gevolge…

 

Epifanie gaan oor die uitwerking van Christus se koms na ons wêreld. Die rimpels op die water het as ’n klein (dissipel)kringetjie begin, maar het mettertyd die ganse aarde in beslag geneem. Tot vandag gee hierdie uitkringende effek in elke nuwe generasie telkens nuwe betekenis.

 

Elke jaar wanneer ons hieroor nadink, gee dit ook aan ons eie lewens nuwe betekenis. Ons is self soos water waarin hierdie ‘druppel’ geval het – en die gebeure duur voort. Die uitwerking van die geboorte van die Kind, Jesus Christus, in mý lewe, neem die res van my lewe in beslag. Die uitkringende effek maak dat elke jaar se Epifanie ’n groter impak op my lewe maak. Nuwe insigte kom by; daar is verdieping in intensiteit en verwagting; betekenis in terme van my eie lewensvervulling en hoop op die toekoms neem toe.

 

Mag hierdie uitgawe meewerk tot verdere verdieping en verryking in elkeen se geloof, se hoop, se liefde.

 

Voorblaaie 2012

Die beelde wat as metafore op hierdie jaar se voorblaaie gebruik word, het almal met waterdruppels te doen. Water het besondere metaforiese betekenis omdat dit vloeiend, deursigtig en aanpasbaar is. Dit is wesenseienskappe wat die metafoor tot verskillende mense in verskillende situasies kan laat spreek.