Van die redakteur

 

Dr Wian Kloppers skryf oor ons lewensreis en eindbestemming. Die buitebladbeeld met grassade (soos gras is ons dae) waarop reëndruppels blink, dra ’n boodskap van kortstondigheid (ons aardse lewe) met die simbool van lewe (water) daarop. Dit vertel iets van ons lewensreis: weerlose, geknakte riete waaraan Christus se lewegewende offerbloed, opstanding en hemelvaart nuwe lewe met nuwe horisonne bied… Die vorm van die sadestingels is soos vlerke wat oopgesprei is om hemelwaarts te vlieg. Daar het in hul stowwerige bestaan bestemming gekom!

 

Die hemelvaart van Christus bring in ons geykte en verbeeldinglose bestaan beeldryke nuwe moontlikhede wat aardse verbeelding te bowe gaan. Ons kan dié reis opnuut aanvaar – in die verwagting dat Christus ons ook enduit (deur ons vreemdelingskap in hierdie wêreld) sal dra – sodat ons die reis kan voltooi en die ewige eindbestemming kan bereik.